პორტალი მუშაობს სატესტო რეჟიმში
ბაში - სოფელი საქართველოში, სამტრედიის მუნიციპალიტეტში, ადმინისტრაციული ერთეული ცენტრი. სოფელი მდებარეობს ზღვის დონიდან 40 მეტრზე, ქალაქ სამტრედიიდან 18 კმ-ში. სოფლის ტერიტორიაზე გადის ცენტრალური საავტომობილო ჩქაროსნული მაგისტრალი. უახლოესი რკინიგზის სადგურია „კოპიტნარი“ (5 კმ), ქუთაისის საერთაშორისო აეროპორტამდე მანძილი შეადგენს 3 კმ-ს.
სოფელი ბაში ისტორიულ წყაროებში მოხსენიებულია 1578 წელს, სახელი „ბაში“ სიტყვა ბაჟიდან უნდა იყოს წარმომდგარი, ამ ადგილებში შუა საუკუნეებში საბაჟო იყო, სადაც მდინარე რიონით ამოტანილ თუ გატანილ საქონელს ბაჟს ადებდნენ.
2003 წელს სოფელში აშენდა წმინდა ნიკოლოზისა და ღვთისმშობლის მიძინების ტაძარი, რომელიც ამჟამად მოქმედია.
სოფლის ტერიტორიაზე მდებარეობს „ვარციხჰესის“ მეოთხე კასკადი, ე.წ. „ბაშჰესი“.
სოფლის ტერიტორიაზე არის გოგირდოვანი წყლის საბადო და ქვიშა-ხრეშის საბადოები.
ბაშში განვითარებულია მესიმინდეობა, მეცხოველეობა, მეფუტკრეობა, მებოსტნეობა და მესათბურეობა.
ამჟამად სოფელ ბაშში ცხოვრობს 1263 ადამიანი.
სოფელში არის 123 წლის ისტორიის მქონე საჯარო სკოლა, ასევე საბავშვო ბაღი, სამედიცინო ამბულატორია, ბიბლიოთეკა, კულტურის სახლი, სპორტული მოედანი და საფეხბურთო მოედანი. სოფელს ჰყავს საფეხბურთო გუნდი „ბაში“, რომელიც წარმატებით ასპარეზობს სამოყვარულო ლიგაში.
სოფელი ელექტროფიცირებული და გაზიფიცირებულია, წყალმომარაგება ხდება არტეზიული და ღია ჭებიდან (ჭაში წყალი ამოდის 5-6 მეტრიდან), არის საკაბელო ინტერნეტი. სოფლის ცენტრალური გზა მოასფალტებულია, შიდა გზების ნაწილი მოასფალტებულია, ნაწილი - მოხრეშილია. შიდა გზების ნაწილი - სარეაბილიტაციოა, უახლოეს წლებში დაგეგმილია მათი რეაბილიტაცია.
