პორტალი მუშაობს სატესტო რეჟიმში
ძევრი - სოფელი დასავლეთ საქართველოში, იმერეთის მხარის თერჯოლის მუნიციპალიტეტში. მდებარეობს მდინარე ძევრულის სანაპიროზე, ზღვის დონიდან 250 მეტრზე, თერჯოლიდან 12 კმ-ში. არის ადმინისტრაციული ერთეულის ცენტრი (შედის სამი სოფელი: ძევრი, ოქონა და სეფარეთი). სოფელში გადის თერჯოლა-ტყიბულის-ამბროლაური-ონის საავტომობილო გზა. უახლოესი რკინიგზის სადგურია „ზესტაფონი“ (22 კმ), ქუთაისის საერთაშორისო აეროპორტიდან დაშორებულია 50 კმ-ით.
ძევრი უძველესი დასახლებაა. იგი იხსენიება შემდეგ წერილობით წყაროებში: ვახუშტი ბაგრატიონის „აღწერა სამეფოსა საქარღველოსა“ და იოჰან გიულდენშტენდტის „მოგზაურობა საქართველოში“.
სოფლის მიდამოებში, მდინარე შავიწყლის ხეობაში ზღვის დონიდან 220 მ სიმაღლეზე მდებარეობს კარსტრული მღვიმე და არქეოლოგიური ძეგლი - საგვარჯილე. რომელიც 1951-1952 წლებში გაითხარა.
საგვარჯილეს მღვიმის სიგანე შესასვლელთან 37 მ, სიგრძე - 13 მ-ია. მღვიმეში და მღვიმის წინ გამოვლინდა რამდენიმე ფენა: ზედაპალეოლითური, მეზოლითური, ენეოლითურ-ადრებრინჯაოსი, ადრე შუა საუკუნეების. საგვარჯილეს მღვიმის მიმდებარედ ორასამდე მცირე ზომის კასტრული მღვიმეა. ეს მღვიმე დღეისათვის მნიშვნელოვანი ტურისტული ობიექტია.
სოფელში არის მე-6 საუკუნის ჩეხნარის წმინდა გიორგის სახელობის ეკლესიის ნანგრევები და მე-19 საუკუნის წმინდა გიორგის სახელობის ეკლესია, რომელიც მოქმედია.
სოფელში შემორჩენილია შუა საუკუნეების ეგუდიელის კოშკი და ეკლესია.
სოფელში ჩამოდის მდინარე ძევრულა, რომელზეც შესაძლებელია ჯომარდობის განვითარება. სოფელში სასურველი პირობებია მეკლდევეობის განვითარებისთვის. სოფელში არის პანორამა გადასახედი, საიდანაც იშლება ულამაზესი ხედი.
ძევრულ ჰესის ტერიტორიაზე მდებარეობს შავწყლას მღვიმე, რომელიც მეცნიერულად შესწავლილი არ არის, თუმცა მასში მოწყობილია ინფრასტრუქტურა უსაფრთხო გადაადგილებისათვის.
სოფლის ეკონომიკის ძირითადი სფეროა სოფლის მეურნეობა, კერძოდ, მევენახეობა, მესიმინდეობა, მესაქონლეობა.
2014 წლის აღწერის მონაცემებით, სოფელში ცხოვრობს 590 ადამიანი.
აღწერის წელი | მოსახლეობა | კაცი | ქალი |
2002 | 1321 | 633 | 688 |
2014 | 590 | 310 | 280 |
სოფელში არის სკოლა, ბაგა-ბაღი, სამედიცინო ამბულატორია, სპორტული მოედანი, შეზღუდული შესაძლებლობის მქონე პირთა პანსიონატი, ძევრულ-ჰესი, კომერციული ობიექტები, ბენზინ გასამართი სადგური და ვეტერინალური პუნქტი. სოფელში არის თანამედროვე სასტუმრო, რესტორანი და რამდენიმე საოჯახო ტიპის სასტუმრო.
სოფელი ელექტროფიცირებული და გაზიფიცირებულია, წყალმომარაგების სისტემის გაყვანილობა სრულდება უახლოეს მომავალში. არის საკაბელო და უკაბელო ინტერნეტის ქსელი. სოფლის ცენტრალური გზა ასფალტირებულია. დასრულების სტადიაშია სოფელ ძევრის ცენტრის სარეაბილიტაციო სამუშაოები (მოასფალტებულია გზები, რეაბილიტირებულ-შეღებილია შენობები, მოწყობილია ფანტანი, მოწესრიგებულია საფეხმავლო ბილიკები).