პორტალი მუშაობს სატესტო რეჟიმში
ზედა საზანო - სოფელი დასავლეთ საქართველოში, იმერეთის მხარეში, თერჯოლის მუნიციპალიტეტში. ზედა საზანო არის საზანოს ადმინისტრეციული ერთეულის ცენტრი, რომელშიც ერთიანდება შემდეგი სოფლები: ზედა საზანო, დელტასუბანი, შიმშილაქედი, სკანდე, ჩიხორი. მდებარეობს ზღვის დონიდან 300 მ-ზე, მდინარე ძუსას მარჯვენა და მარცხენა სანაპიროზე, სოფელში აგრეთვე ჩამოედინება მდინარე მაძარულა. თერჯოლიდან დაშორებულია 12 კმ-ით, სოფელში გადის ტყიბული-თერჯოლა-ჭიათურის დამაკავშირებელი საავტომობილო გზა, რომლის რეაბილიტაცია დაგეგმილია 2020 წლისთვის. რკინიგზის უახლოესი სადგური „ზესტაფონი“ სოფლიდან 17 კმ-ში მდებარეობს, ქუთაისის საერთაშორისო აეროპორტამდე მანძილი შეადგენს 65 კმ-ს.
სოფლის მიდამოებშია კულტურული ძეგლები სკანდეს ციხე (III – IV საუკუნეები), მუჯირეთის მღვიმე (ქვის ხანის), ჩიხორის ნაქალაქარი კოშკი (III საუკუნის); მდინარე ძუსაზე არსებული კანიონები - ქადაგიძის რაფი, სადაც არის ნიანგისებრთა ოჯახის წარმომადგენლის ნაკვალევი (60-65 მილიონი წლის წინანდელი).
სოფლის ტერიტორია ნაწილი იყო ჭალატყის ნაქალაქარისა, რომელშიც შედიოდნენ ზესტაფონის მუნიციპალიტეტის სოფლები ჭალატყე, ზოვრეთი, ქვედა საზანო, ტყლაპივაკე, შიმშილაქედი და ამჟამინდელი თერჯოლის მუნიციპალიტეტის სოფელი შიმშილაქედი. ლეგენდებში ნაქალაქარი „ბალიასტომად“ მოიხსენიება.
სოფელში არის XVII საუკუნის ღვთისმშობლის მიძინების ტაძარი, რომელიც მოქმედია.
სოფელი ზედა საზანო განთქმულია მეღვინეობითა და მესაქონლეობით, სოფელში მოდის ასევე ჩაი და კენკროვანი კულტურები (მაყვალი, მოცვი). სოფელს გარშემო ერტყმის შერეული ფოთლოვანი ტყე (მუხა, რთხმელა, წიფელა, წაბლი და აკაცია), რაც სასურველ პირობებს ქმნის მეფუტკრეობის განვითარებისთვის.
სოფელში არის თანამედროვე ღვინის ქარხანა, ღვინის შემნახველი სარდაფი (მარანი) და თანამედროვე ტიპის სასტუმრო (ტურისტული კომპლექსი). კვირაში ერთხელ (ოთხშაბათს) ზედა საზანოში იმართება სასოფლო-სამეურნეო პროდუქციის რეგიონული ბაზრობა.
2014 წლის აღწერის მონაცემებით, სოფელში ცხოვრობდა 1260 ადამიანი.
აღწერის წელი | მოსახლეობა | კაცი | ქალი |
2002 | 1668 | 824 | 844 |
2014 | 1260 | 631 | 629 |
ზედა საზანოში არის საჯარო სკოლა, საბავშვო ბაღი, სამედიცინო ამბულატორია, ბიბლიოთეკა, საზოგადოებრივი ცენტრი, სადაც ერთი ფანჯრის პრინციპით ადგილობრივ მოსახლეობას შეუძლია სახელმწიფო და კერძო სერვისების მიღება.
სოფელი ელექტროფიცირებული და გაზიფიცირებულია. წყალმომარაგება ხდება ცენტრალური სისტემით, არის უკაბელო ინტერნეტის ქსელი. სოფლის ცენტრალური გზა მოასფალტებულია, შიდა გზების ნაწილი მობეტონებულია და ნაწილი მოხრეშილი.